Werbung


D Bängg vo dr Basler Schnitzelbangg Gsellschaft 2006


Aigebreetler

S Babsi Hungerturm, vulgo: Schneider's Barbara
will vor de Baize e ainhaitliggi Bestuehlig ha
mit dääne Blastigg-Stiehl kah sy sehr guet lääbe
als Politikerin syg sy's gweehnt, am Sässel z glääbe

Vyyli Basler pändle uff Ziiri, Daag fir Daag
und laischte so Entwiggligshilf, Daag fir Daag
numme dangg däm Bemiehe kah's nämmlig glinge
as bi dääre PISA-Sändig Ziiri duet gwinne

Dr Ivo Bachmaa, daas isch dr Chef vor dr BaZ
mach in synere Redaggzioon ganz kreftig Rabatz:
"Lewin-Fotti dien mir in dr Zittig ab sofort stryyche,
"dä duet z fescht ere Karikatur vom Mohammed glyyche"

D BVB duet jetz no Kondom verkaufe
ich glaub nit, as daas Gschäft duet laufe
d Kunde befirchte doch, daas syg e Bschiss
so wie bi de Combino - die hänn jo au Riss

In dääre Late Night-Show zaigt uns barsch
dä von Rohr-Rocker sy hoorige... Hinter
will är do drmit adytte, as es nyt scheeners an ihm gitt?
Drnoo muess y saage: Do widersprich ich ihm nit

Waas die Gigi Oeri kah, daas kaa-n-y au
sait sich d Esther G. - daas isch die Pittbull-Frau
bald due-n-y als Presidäntin vo Bayern Münche walte
dert "Kahn"- y legal e Kampfhund halte

As me Bolizeybeschte schliesst, isch nit wäggem spaare
me will d Schugger vor em Verwaichlige bewaare
die selle nit z vyyl dinne im Warme blyybe
sondern uuse uff d Gass go Buesse schryybe

In de Kindergärte derfsch Baseldytsch nimme bruuche
y glaub nit, as daas d Kinder z'fescht duet schluuche
due doch loose, waas sone Goof hit vo sich gitt
also: Baseldytsch isch daas sicher nit

E bizz muff loot dr Schild jetz s Regiere sy
näbbem Eymaa isch är nie dr Scheenscht gsy
als Swiss Olympics-Preesi isch är us däm Brobleem duss
näbbem Zloczower gseht sogar d Merkel guet uss

Bi mir isch es dräggig - my Frau kunnt im Huushalt nit druss
mir längt's - y mach Duurzug - und dr ganz Drägg isch duss
am näggscht Daag hyylt d Regierig, as Gott erbarm
langsam fahre - nym haize - mir hänn Fyynstaub-Alarm

Y find's guet, hett dr FCB dä Japaner kauft
well's in dr Verdaidigung jetze vyyl besser lauft
bi jedem Stiirmer verbeugt sich dä und sait mit Lache
"Bitte walten mit schiessen, elst Foto mache!"


Babberlababb

Im Vatikan hänn si sich fir e Neie bsunne
der Papa Ratzi het als Bayer dytlig gwunne
doch bi der eerschte Mäss scho het er sich verhaue
und bim Urbi/Orbi lut "Oozapft is" gschraue

Unsere Bäär isch zum im Winter kenne pfuuse
nach Italie-n-ab und uus Grabinde uuse
däm aarme Mutz goots dängg halt wie bi uns de maischte
wär kaa sich in der Schwyz scho d Ibernachtig laischte

D'Sturmtief z'USA het me benennt nach Fraue,
Katrina, Wilma, Rita hänn alles zaemmeghaue
Z'Baasel isch es Gott sei Dangg nimm ganz so schitter
Will s' Duurdieff Zanolari ziet jetzt aentlig wyter

Wo mir bim Faare ins M-Budget-Handy lalle
Isch is s'Prix Garantie Sandwich grad aabegfalle
E Schugger sehts, es git e Buess, dae Maa blibt hart
Doch immerhin gits Phynggt fir d'Supercard

Im Zuug ae Syygarette rauche kasch vergässe
Muesch warte oder Niggotyynkaugummi frässe
E dritti Meegligkait waen mir eich nit verschwyyge
Kasch zum Rauche schnäll bim Stromuusfall uusstyyge

Zem Keschte spaare soll dr 5-Räppler verschwinde
Die Ydee macht sich in Lieschtel kaini Frinde
So mien d'Baselbieter glyy, die lyyde Gwaale
Fir d'Subentione s'dopplete an Baasel zaale

E Sprichwort said dass z'vyyli Kech dr Brei verdäärbe
jae sii, die Wyyshait gits scho lang uff dääre Äärde
aber ai Koch kennsch, dää schafft das ganz elai
faart schnäll uff Roeschenz, verdirbts und goot denn hai

Mir wänd eu herzlich da bi eus willkchomme heisse
Da isch de Hit, chasch dich vor Lache grad weg schmeisse
Ou i wott hie bi euch baud afa schaffe
So deents wenn d'hittzudaags kli Kaffi Baal duesch gaffe

Grad nach der Fasnacht wäärde mir in d'Ferie goo
Gratis und franko richtig Süde d'Schwyz verloo
Vo Milhuuse goots ab Terminal B3
In Zälle 8 im Flugi vo der CIA

Nach em Match in Istanbul sinn baar so Fleegle
In de Katakombe mit Schwyzer go schleegle
Wurum hänn die sich nit an Zubi ane draue
Dää hätt bim zrugg gää soowisoo drnäbe ghaue

Mir mien jetzt wyter zie, es isch jo wiirgglig schaad
doch wenns eich gfalle het hänn mir e Tipp baraat
Druggsch 482631 uff Dim Deelefoon
Scho hesch de Schnitzelbangg als neie Glingeldoon


Bebbi-Buebe

Basel schloot dr Schparkurs i
Lut Herzog Evi mues das si
S wird iiberaal gschtryche das muesch halt gsee
Nur Kuugeleschryyber gits viel mee
Dä Uffwand dä muesch wäge de Schugger bitryybe
Denn die mien am Daag zää Buesse schryybe

Mir drei mir sinn go wandere
Vo aim Dinosaurier zem andere
Bi däm Rundgang hänn mir ganz glaar gsee
Fleischfrässer hetts scho ze Urzyyte gee
Zwai sinn aagfrässe - ain flichtet in Ryy
Dr Schpur no kas nur e Kampfhund gsi si

Fir aimool kunnt dr schnällscht uss em Kanton Bärn
S isch dr Lüthi Tom dä Motorad Stäärn
Eme Basler kennt das nie basiere
Dä hätt kei Ruum zem frei trainiere
wurd dä mit em Döff dur Basel flizze
wurds an jedem Egge blizze

Letschti hänn mir im Vögeli welle go Kleider kaufe
Doch dä het zue - kasch wyters laufe
Derno hänn mir gschwind in Hahn welle iine
Aber au dä het zue - jä s isch zem gryyne
Das Gschiss wo die mache - das macht uns muff
Die Vogelgrippe reggt uns uff

Deutschland sucht den Superstar
Doch finde die nie ain das isch jo glaar
In Basel kennt me das au das Fescht
au do - do findet me nie dr bescht
Bi uns goots au um Stimme und Zaale
Und heisse duet das - Regierigsrootswaale

Mir drey wänn schutte bim FCB
Doch wo s Gigi uns gseet sait die oje
Au dr Trainer - dr Ziircher Chrischtian Gross
Findet d Idee iberhaupt nit famos
Derbi hänn mir drey luschtige Gselle
Uff d Foti vo dr neggschte Schoggi welle

Rauche deerfsch - mir finde s dr Waan
Iberhaupt nimm in dr Yysebaan
Im Drämmli derfsch nid ässe und dringge
Si uns duet das schuurig schtingge
S neggscht wo die verbiete sotte
Verbot iifiere isch verbote

Dr Schampadis hett im Migros e Budget Natel kauft
Är hett d Karte dri do und gluegt ebs au lauft
Verglemmi s geet nix - hersch dr Schampedis toobe
Dä Migros Grimpel kann i gar nid loobe
S Problem dien mir drey erruiere ganz fix
Muesch d SIM karte neh,mit Cumulus geht nix

Drey Daag offe und dernoo zue
No drey Daag hänn mir wiider Rue
Drey Daag sinn mir tolerant
Dr Räschte vom Joor kasch ins Pfäfferland
Mir dien das begriesse naime duure
Wenn das zelle wurd fir e Ziircher Schnuure

Si i mues dringend no e Byyljee ha
Hösch digge du bisch hinder mir dra
Eb EHC Matsch oder Musicel Cats
Ooni Byyljee bisch do lätz
Sit neyschtem bruuchts eins - jä mir drey mir dien toobe
Fir d Bundesfiir uff em Ritli oobe

Das Iikaufszentrum Basel Schtadt
Das finde mir drey schambar glatt
Doch isch s do wie in jedem Laade
E Grosssarnierig ka nit schaade
Drämlischiine mieste neyi ane
Au s Leitigsnetz muesch ganz ney plane
D Stroosse miest me ängger mache
Und d Grossbauschtell grad Iberdache
Wenn si im Summer dien baue,denn sinn mir verschosse
Drumm hänn mir denn wäge Umbau gschlosse

Bi uns deheim duet ney e Kater umme gnaisse
Doch wisse mir nonig wie är sell heisse
Mir hänn gmeint dä wurd unseri Fliege jaage
Iber das Viich kenne mir aber numme klaage
Dä länggt viel dernääbe und duet numme penne
I glaub mir dien dä Zubi nenne

Mir Bebbi Buebe mache jetzt schluss
Denn s warte jo no andri duss
Mir hoffe das ihr eych guet benämme
Und sage jetzte sali zämme


Biezer

D Regierig sait, und will jetzt wider investiere,
dää nei Campus dät die Stadt in d Zuekunft fiere.
Glaini Wintsch vo dääre Firma gältis positiv z beglaite,
Glyybeg - Santihan wird eins, mir mien jo nur dä Ryy umlaite.

E Schwumm im Ryy lauft jetzt wie d Waal zum Grosse Root,
die Regle die muess kenne wär deert yyne goht.
D Ufmerggsamkait verschaffsch dr mit dr groosse Glappe,
was au empfohle wird bim yynegoh isch jetzt e roti Kappe.

"Diesche Virüs übertrasche nur mit Vögle,
bei sonst Kontakt isch das üüberhaupt nischt mögle!"
Das isch kai Aids-Kampanie, nei, mr mien si bitte,
das isch dr Couchpin wo n is informiert zur Vogelgrippe.

Dr Sämi Schmid tuets jetzt lut uusedängge,
d Parteizuegherigkait wurd ihn als Chef ischrängge.
Dä Verein sig nimm' si Haim sait äär und meergi,
s Dängge sig per see nid däne ihri Steergi.

D Regierig reedet gscheit und macht sich' s amme ring,
Gschdiel und Schirm voruss schribt voor e Marketing.
Die nenne das sogar - " Wie haisst' s? " - Coop-Identity?
Mi Frau die trifft das hart, die kauft doch nur im Migros ii.

My Frau die sait zu mir, si findis nym zum Lache,
dr Sämi Schmid dät mit em Lühti Duzis mache.
Wenn au du s emol zu eppis wellisch bringe,
denn miestisch Töffli fahre anstatt öödi Värsli z singe.

Dr Moritz Laiebärger isch letschti z Basel gsi,
im Interview meint är, s haig ihm gfalle do am Rhy.
Mr hän kai Wort verstande und bitte äärnschthaft drum,
löhnt dä Minischter nymmi yyne ans LSD Symposium.

Bim Bierli yyneloh, do zahlsch fir s Glas fimf Frangge,
für d Buess am Baum ains uusezloh, kenntsch 10 mol Bierli tangge.
Mr hänn is gfrogt und iberlegt, doch uns kennts do nid braiche,
Als Bänggler geen mir exklusiv, nur Anderne ans Bai go saiche.

My Noochber sait zu mir, si mieste jetze spaare,
d' Frau haig e Budget Handy, äär e Budget Kaare.
Was billig au kaa heisse, sehn mr denn bald yy,
mr findes scho no schääbig, si Glaine tauft dä ALDI.

Die Däne sin doch däne, dien do provoziere,
Dr Mohamed dä deerf me doch nid karrikiere.
Mr dischtanzieren' ys und saage kumm jetz göömr,
an' s Smørrebrød-Byffee und bstelle solidarisch Döner.


Die Gsalzene

Voll Weemuet dänggt dr Jögge Schild zrugg ans Vrbrächerjaage
D' Entzugserschynig mues er wool nid bsunders lang erdraage
Mit so korubbde Brieder gitts jetz bald e fraidigs Widersee
An dr erschte Sitzig z' Lausanne bim Olympisch Komitee

Imme Bärner Schuelhuus duet me bald dr Notstand proklamiere
Will sich dert zwai Erschtklässler massiv terrorisiere
Dr Glainer spielt dr Keenig duet em Grosse d' Fuscht garniere
Dr Grossi duet sich mit 'me Brünneli in Durnsagg revanchiere
Dä wo das Problem vrursacht hett muess Dinte gsoffe haa
Wär setzt scho aim wo Moritz haisst e Christoph näbedraa

Nur ebbis dien die Kindskepf zämme wooge
In dr Pause dr glai digg Sämmi blooge

Am Bosporus hett d' Schwyzer Nati d' Fuessballschlacht entschiede
Drotzdäm hänn mir Gsalzene die tyrkisch Mannschaft staargg beniede
Will unsri Basler Seel wurd juble kennt me sonre Zyrcher Pflutte
Wie em Ritchy Cabanas ains greftig hindde yyneschutte

Und länggt das nonig fyr dä Zwuggel
Gitts no e Tritt vom Benny Huggel

Uralts Flaisch, e ranzigs Schnitzel, ganz mit Schimmelpilz beleggd
In Dytschland hett me massewyys vrdorbni Waar entdeggd
Wo hetts so fuuligs Flaisch bi uns - die Antwort isch banal:
Die greeschti Mängi laageret im Nationalrootssaal!

Bi däm Gschiss um d'Vogelgrippe duet me kräftig ybertriebe
Do goot no ganz vrgässe, welli Vorteil ybrigbliebe
Denn wenn e jede, wonne Vogel hett, die Grippe wurd bikoo
Wäre uff aimol jo numme no ganz wenig Zyrcher doo

Zer Vrseenig dien dr Sabo und dr Koch e Golfmatch wooge
Wo dr Sabo puttet isch em Koch dr Sand um d' Oore gflooge
Druff maint dr Koch euphorisch: "Zem vrgää bin ich baraad
Denn wär so mies yylocht wie Du läbt sicher sträng im Zöllibaad!"

"Gränze zue - Freyzyygigkaid das isch e Mist" said d' SVP
Das hämmir uusnaamswyys vo Aafang aa genauso gsee
Au mir Gsalzene schleen vor, dä Grundsatz konsequent z' beachte
Denn wär wurd scho gärn d' Frau Zanolari freyzyygig bedrachte?

M-Budget - Gyz isch gail - mir Schwyzer draaie jede Rabbe
Dä Spartick wurd schynt's langsam au uff d'Fasnacht ybreschwabbe
Drumm dien mir uns am Trend vo mänge Schnitzelbängg uusrichte
Wo us Spargrind scho syt vyllne Joor uff Pointe dien vrzichte

Monschtervärs

Syg nätt zue Deppe mit Beschwärde
Si kennte Dini Chefe wärde
Dangg dämm Vrhalte sin so Horde
Wie d' Amis zuenre Wältmacht worde

Dä Grundsatz hämmer iibersprunge
Letscht Joor e Värs vom George Bush gsunge
D' Konsequänze hämmer gspyyrt
Dr CIA hett uns entfyyrt

D' Amis hänn gsait:" Eych Terrorischte
Dien mir dr kranki Kopf uusmischte
Drzue erniidrige und zwinge
Im Musikantestadel z' singe

Und wehret Ir Eych, dert mitzmache
Wisse mir no schlimmri Sache
Denn gitts zer Stroof fyr eyer Gfasel
No 4 Stund Bängg vom Tele Basel!

Bim Ghaimdienst gilt syt vyllne Joor
Dr Bush gitt's gaischtig Niveau vor
Drumm dien mir zem Eych integriere
Dreiviertel Hirni ambutiere!"

Jetz kennet Ir nimm gradus dängge
Mir dien Eych drumm s' Vertraue schängge
Und Agente bresentiere
Wo fyr uns d' Schwyz usspioniere

E Topagent haisst Benny Turnheer
Dämm si Gschwätz wirggd wiene Sturmgweer
Er paggd si Gegner - nimmt en duure
Und duet in kampfunfähig schnuure

Dr Malama die winzig Boone
Duet sich fyr CIA-Zwägg loone
Mir nutze drumm dä glai Spion
Als Abheergrät im Delifon

Dr Felix Moppert 007
Hett fyr uns Striplokal betriibe
Bim Yysatz Fraue eng beschattet
Und schynt's zer Tarnig au begattet

Die Situation kennt eskaliere
Wie sotti d' Schwyyz druff reagiere?
S gitt nur ai Wäg us däre Noot:
Die Gsalzene in Bundesroot!

Dr Felix Moppert 007
Hett fyr uns Striplokal betriibe
Bim Yysatz Fraue eng beschattet
Und schynt's zer Tarnig au begattet

Die Situation kennt eskaliere
Wie sotti d' Schwyyz druff reagiere?
S gitt nur ai Wäg us däre Noot:
Die Gsalzene in Bundesroot!


Die Haiggle

Ych bi haiggel är ischs au
Syt fimpf Joor kalkuliere mir ganz genau
Und fir circa 20 Millione
Wurde miir sogar nääbene Ospel go woone

Ganz under uns: miir sin gärn bsoffe!
An dr letschte Fasnacht hänn miir is verloffe
Im Bündnerland hänn miir is wiider droffe
Well deert danzt dr Bär und s isch nid numme drei Daag offe

S Fyynstaubbrobleem, dodriiber dien mir briete:
Isch s Auti tschuld, soll me daas verbiete?
Au im Frankryych, dien sie dä Zämmehang erkenne
Nur bringt s nyt, wenn sy d'Auti verbrenne

E Braitbild-Färnsee hänn miir poschtet
Dr Breitscht, dää wo am maischte koschtet
Dehaim mergge miir, dä Kauf isch fir d Katz
Denn dää Tisch vo dr Daagesschau het immer noo kai Platz

Ab und zue heere mir d Lyt saage:
"Heered doch uff, das kaa me nid ertraage!"
Mir wärde fascht unsicher, doch leen is nid blooge
Well die sinn sicher iiber Black n Blond härzooge

D Angelika Z. und der Marcel O.
D Gigi Ö, d Esther G. soowisoo
Wenn s z Basel schlächti Noochrichte git
Isch d BaZ diskret und schribt dr Noochnamme nid

Mir sinn vorusse gsässe zum d Wält vergässe
Pletzlig beebt die Ärde wie versässe
Nid gwisst wie n is gscheet, hänn miir bätte zu Gott
Drby isch s ein vom Baudepp wo my Blastiggstuel wott

Dr Schwyzer Film wird zelebriet
Dr Hollywood-Stiil erfolgryych khopiert
Mit vyyl Gäld drait me z Basel jetzt groos
S'Kettesäägimassagger an dr Zollfreistroos

Dä Grounding Film duet uns schoggiere
Angscht hän miir das kennt jetzt au dr BPG bassiere
Drum seesch uns nur no uss em Drämli wingge
Das isch scho am Boode und kaa nymm diefer singge

D Swiss het mee Phasaschier dransbordiert
Miir hätte gärn globt und gratuliert
Just denn kunnt e Fax, wo is informiert
Die Plätz sin fir d'Gescht vo dr CIA reserviert

Fremdi Religioone muess me respeggdiere
Sunscht kennt e ganzi Region explodiere
Mir Grischte dien halt verninftig debattiere
Wär s nid glaubt, soll dä Fall in Röschänz konsultiere

"Ich bin Kanzler", sait me als aine
"Wir sind Papst", dien graad alli maine
Mir habemus gnueg vo däm Saich
Sinn die aigentlig biirewaich?

D'Swisscom duet e Huffe Gäld generiere
Dasch dr Grund worum dr Bund will privatisiere
Miir erkläre ihne gärn wisoo si nid soll bliibe
Dr Bund bhaltet nuur was Verluscht duet schriibe.

D'Keschte fiir d'EM sinn unberächebaar
Usser wär s zaale sott, daas isch sunneglaar!
Em Bundesroot empfääle miir, es wuurd sich loone
Vyyl Gligg und e Loos vo de Euro-Millioone


Die Verlumpte

Zur EU-Oscht-Freiziigigkait hän mir gsait "jo"
Sithär deerf vo dääne jede zue uns ko
Gwiissi Tschumple dien die Reeglig falsch verschtoo
So gseesch dr Zubi ain am andere iineloo

In dr Diirggei ringt amme s Häärz mit em Verstand
Und s Tämpramänt nimmt allewyl mol iiberhand
D aarm Diirggei isch ganz verruggt me ka s verstoo
Will si nit deerf und Schwyz nit will in d EU go

Dä schnuusig Bär, wie hän mir gschtuunt, wo dä isch ko
Si Winterspägg aagfrässe und wider drvoo
Au als Basler kasch vo dääre Taggtigg leere
Und wie dr Ospel z Wollerau vom Voorroot zehre

D Berlusconi und dr Jackson dien das mache
E sogenannt Face-Lifting und denn dien alli lache
Männgmool goot e sone Lifting halt in Hose
Sithär dien mir s Schwyzer Färnseh nur no loose

Die kaibe Schwoobe s komisch Volk ääne am Ryy
Au in der Technik sin si deert rächt hindedryy
Zem mit uns kommuniziere mir hän s checkt
Het me jetzt au z Gränzach s Rauchsignal entdeckt

Dr iranisch Bresidänt duet beeses saage
Und denn jublet s Volgg me ka s kuum no verdraage
Klar dass so ebbis bi uns uff kai Fall goot
Usser s loosi ebber uff e Bundesroot

Monschtervärs

Bi de Schwoobe weiss me nit wär soll regiere
Wär isch scho fähig sone Bandi z fiere

Nimmsch emool dr Westerwelle
Dä riert gärn mit dr grosse Kelle
Är wurd mit ryych oder mit aarm
Jedi Partei wird mit im warm

Dr Joschka Fischer wurd gärn blyybe
Und duet sich am Schröder ryybe
Aaber dr Gerhard dä het s gsee
"Ich geh jetzt lieber zu Ringier"

Dr Stoiber dä will au verraise
Und sait "die Merkel hat ne Meise"
E Ossi und zuglyych e Frau
Sig e modärne Super-Gau

S isch dr Aafang nur vom Ändi
In Sicht isch ganz und gar kai Wändi
Und d Wält wird mit in Abgrund grisse
Vo de Schwoobe s isch verschisse
Uff e Punggt brocht knapp und groob
Jetzt isch au no dr Papscht e Schwoob


D'Kulturstolperi

Ab sofort sott jetzt mien mir sage, es macht`ys wirgglig muff
Alli Kampfhünd Muulkörb draage, no hört das bysse-n-uff
Die Masnahm die wär sicher guet, das weiss doch jedes Kind
Denn-hätte-n-au dr`Couchepin und dr`Blocher ain am Grind

Die ney Blagedde, die isch toll, kasch sage was de witt
Hösch Digge die isch wundervoll, e absolute Hit
Dr Deggel uff, kei Hirni dinn, do mergge-n-alli gly
An däm banale Fudigsicht, kas nur dr Zubi si

S`Glaibasel isch e`tolli Stadt, griegt e scheeni Claramatte
D`Grossbasler, mit dr Fryestroos, die stehn do böös im schatte
Und wotsch du denn als Gyggolo, durch dä Park flaniere
Do kunnt sofort e`Edelnutte, und will grad ykasiere

Kirzlig hett mir aine gsait,;"Är isch vom andere Glais"
E`so e Matsch vom FCB, das find ich eifach haiss
DÀtmosphäre duet im Joggeli, aim so richtig pagge
Wenn ich bi myne Gaye hogg,:" so Fudibagge an Bagge"

Yber unsery Basler Schugger, do wird ich nimme schlau
Sin friehner gfahre, genau eso wies Auto, nämmlig Blau
Und wenn-se denne hyte gsehsch, so Rot-Wyss uf dr Pischte
Do muesch Di froge, sinn das ägscht, Öschtrichischi Tourischte

Mir zwei Kulturstolperi, froge d`Sascia Frei
Sie was isch mit eurem Maa, es gäb e riese Gschrei
Do sait d`Sascia: "mir isch glych" & klopft denn uff e Disch
Sy Nachtlokal, das isch mir wurscht, so weis ich wo-ner-isch

An däm bööse Fuessballmatsch dert in Istanbul
Schuddet unseri Fuessball-Natzi, nit eso ganz kool
Im stille froge mir uns zwei worum au und wieso
Hänn unseri Schwyzer Türke-Hoonig-Schnitte überkoh

Mir als Kulturstolperi, hänn e`Grossroots-Sitzig bsuecht
Do simmer arg verschrogge, do wird gwättered und gfluecht
Sie mir hän das Glyyrr verfolgt, wyt yber 13 Stund
Das ka jo nur dä Fynstaub sy, wo do use kund

Lueged do my Helgeträgere, das isch my Fasnachts-Sozi
Doch hann ich als e glunges Gfyhl, Sy isch e bitz e Glotzi,
Pletzlig dänngi, s`kennt jo sy, dass Sie uff däre Ärde
Mit däm Outfit d`Chance hätt, au Bundesrötin z`wärde


Dr Edeli

Y bii dr glaini Edeli
my Lehrer bringt dr Spruch
äär krieg, wenn y soo wyter miech
e Näärve-Zämmebruch
Verzell y als no soo e Kääs
gääb's friener oder spoot
fiir mii heggschtens e Arbetsplatz
in Bäärn as Bundesroot

Dr Fux isch schaarf uff Hiener als
dr Hund isch schaarf uff d' Katz
Dr Jääger schaarf uff s'Wild im Wald
dr Verliebti uff sy Schatz
Dr Bäär isch schaarf als uff e Fisch
dr Sammler s'Baslerdyybli
und dr Behring, s'isch bekannt
isch schaarf uff gstraiffti Lyybli

Uff em Rütli bii n'y d'Aasprooch no
vom Bundesroot go loose
doch pletzlig stand y mittedrinn
vo "beglatzte Nietehoose"
Y froog ain wo drey Finger streggt
was die bedytte selle
do maint dää "Wirschtli-Winggelried"
bis deert kenn äär scho zelle

S'hänn pletzlig a me Fuessball-Matsch
uff satti Schwyzer-Poo
in Istanbul halbschlaui Fään
saumässig Gluscht bikoo
Y glaub die wisse gar no nit
die aanigsloose Niete
as miir näbscht unsre Fuudi au
no Kääs und Uhre biete

Dr Kampfhund "Hugo" z' Minchestai
kaa's aifach nit kapiere
as iin dr Maischter jetze als
sott an dr Laine fiere
Er knuurrt und dänggt sich, nundedie
das kaibe "Larifari"
wenn ebber a ne Laine gheert
no isch's d' Frau Zanolari

S' sin unsri "Schnägge-Rennschyy-Lytt"
geege Friener nimm z' verglyyche
Es duet dr weh, wenn de muesch gsee
wie sy dr Bäärg drabb schlyyche
Dr Plaschy hett's nomoll probiert
und wiider ney aagfange
doch bim erschte Slalom steent er scho
"Jesses, doo hett's jo Stange"

Iirem "Zubi" haig me Unrächt tue
hett sy Frau doo letschthii zwängt
Me saag anstatt dr Ball verwitscht
haig äär drnääbe g'längt
Sii kenn das aifach nit verstoo
sy wuurd' s jo als erlääbe
wenn äär als mit re zämme syyg
no läng er nie drnääbe

Dr Pabscht reggt sich als gwaltig uff
nit erscht ab letschte Jänner
wenn äär vernimmt, e Ehepaar
bestoot uus lutter Männer
Erscht haig er ze me Bischoff gsait
dämm sy Namme syyg glaub Fälber
kunnt pletzlig d'Liebi iiber dy
syg braav und lieb dy sälber

Myyni Eltre leen my nimm uff d'Gass
me schliesst my yy, kai Witz
traag au Hoose nur uus Blääch
e Schloss am Hooseschlitz
My Slip dää isch uus Stacheldroot
das steert my bim Riläxen
und das will er frey ummelaufft
dää kaibe Meikel Tschäggsen

Letschthii hesch in dr Zyttig gsee
e Maa putz fiidleblutt
my Mammi isch ganz duurenand
dr Babbi halb kaputt
Er maint, dää angaschiersch mer nit
wenn dää blutt suuge duet
und diir nimmt's au no d'Glaider dryy
kunnt' s nundedie nit guet.


Dr Schorsch

Ich bi dr Schorsch vom Haafebeggi II
Mit goots sauguet s lauft wiider ywandfrey de hai
Waisch mit dr Frau nur dinne hogge duet mr gruuse
Doch jetze dörfe jo wiider alli Hiehner use

Jä ussem Vatikan het me do letscht erfaare
Schwuuli au Hetero dye keje durchs Verfaare
E Prieschter dörfi weeder Vogel sy no Fisch
Ain wye dr Koch wär guet wo kains vo baidem isch

Hesch gwüsst dass sy dye neuje Buesse grad kassiere
Sait my Frau: dye duet my total irritiere
Sy sait: wenn noochhär uss dr Baiz kunnsch, heschs begriffe
No kunnts saudüür wenn wiider duesch an Egge schiffe

Dr Guschpä isch e Fän vo dr Grup Mütüel
Wenn är nümm Bundesroot isch griegter dört e Stell
Ganz ohni Lohn das isch so abgmacht kaschen frooge
Är haig als Bundesroot vo dääne scho bezooge

Bevor ich d SChruube mach due ich no "Schpinnsch Hösch" lalle
Wo mir dä Türgg z mittst uff dr Brugg duet aini knalle
Nur welli zue nem gsait ha … also das vermueti
Ich wünsch dr denn für d WM z Dütschland alles gueti

Syt zwai Moonet hat ich bständig nur gschtudiert
Wye so het jetz dä Elten Tschon e so pressiert
Jetz ha nis duss und waiss jetz au dr woori Grund
An synere diggi a isch Zyt dass s Buschi kunnt

Ich bi Yglaade gsi … do muess me aifach go
Zum Chris von Rohr an syny erschti Leyt Neid Scho
Und dörte fallt mr uff dä Spruch grad über sym Tisch
"Wär kai Hirni het … dä zeigt halt … was er isch"

Dr alti Papscht isch wye ne Brueder gsi für mii
Und jetz dr Benediggt … dä sait mir wiider … Sii
Jä guet will är mi Fründschaft numm isch das kai Drama
No wird halt jetz my neuje Fründ … dr Dalei Lama


Gluggsi

Die siebe us em Bundeshuus
gsehn alli zum Vernasche us
dä mit em Zingge mues i ha
dört hetts am meischte Schoggi dra.

I ha mir do so in dr Nacht
ibers Rauchverbot, Gedanke gmacht
Drum kauf ich jetz ihr miends begriffe
fir mi deheim e Wasserpfiffe

Bi GC klappt fascht gar nüt meh
kei Stadion kei Trainer das duet weh
nur eins blibt derte no bim alte
Ihri grossi Schnuure, könne si bhalte

Sinn unseri "Schyy-Ass" so im ganze
statt uff de Schyy maischt uf em Ranze
Sy hänn scho rächt, die Schneeushööler
im Lige isch's dr eifach wööler.

Mi Frindin kurz und barsch
git pletzlig mir e Schutt in Arsch
druf abe sait die gueti Frau
bim Schutte mache si das jo au

In Dytschland git's es isch zum Schreye
neystens Würscht, us Innereie
je das schlot mir uffe Maage
Ich ka die Schwoobe nit vertrage

D'Army-Swiss isch am verschwinde
bald kasch kei Soldat me finde
S'goh nümme lang wird akurat
ussem Sämi-Schmid e Bleysoldat

D'Klarastrooss i kas nid verstoo
soll wieder e ney Gsicht bykoh
denn ich ha's Gfyhl und ha mr gschwoore
die hett scho lang Ihr Gsicht verloore

Dä fyn Staub käm vom gribene Gummi
my Frau het allewyl e dummi
Si het my e fange Nacht für Nacht
wäge de alte Pariser staubig gmacht

Uff unserem scheene Rütli oobe
dien Neo Nazi umetoobe
doch wo d'Schwiigermueter ko isch Zoobe
sin si usenandergstoobe

Jetzt mues y und kaa's nit verstoo
my Kampfhund schyyn's Deheime loo
An synre Stell, es isch e Hit
nimmy halt d'Schwiigermueter mit


Rätschbääse

Dr Pfaarer Sabo kämpft mit Häärzbluet geege s Zölibat
am letschte Närv vom Bischof Koch är ganz versässe nagt
d Abschaffig wäri guet und rächt, doch wyrds uns mächtig steere
wenn eine wie dr Bischof Koch sich au no kennt vermehre

S Charivari goot all Joor au Altersheim go bsueche
mir finde daas en eedle Bruuch, so Byspiil muess me sueche
bolitisch git s fir d SVP die umkeerti Variante
dr Dunant kenn in d Kindski goo als alti Määrli-Dante

E Grufti vo fascht nyynzig Joor het sich nit scheniert
und am Bahnhof s Auti uff em Drämmliglais parkiert
speeter uff em Spiegelhof duet är stuur bedoone
d Maarkierig zaigt doch dytlig: deert isch jetzt blaui Zoone!

Schuum vor em Muul, zittrigi Händ, dr Maage foot aa drugge
Schweiss uf dr Stiirn, voll uff Entzuug, nerveeses Augezugge
s isch verbotte, s isch verpeent, doch d Gfoor duet schuurig logge
miir geen jetzt in dr Steine uff e Blaschtigstuel go hogge

Klick, klick, klick, klick, klick, klick, klick, so duesch hit Paartner sueche
ain wo guet kocht und butzt und liebt und wo fascht nie duet flueche
im Chatroom machsch e Dräffen ab: s Häärz blybt vor Schrägge stoo
hesch di uff e Wunder gfrait - jetz stoot dr Minu doo!

Dass dr Jackson schuldig isch, das kaa me glatt vergässe
die Kinder sinn uus Zuefall nummen uff sy Scheessli gsässe
jetz isch er stier und suecht e Job sogaar um jeede Bryys
d IKEA hätt villicht e Blatz im Kinderparadies

Belaade wie Kameel hämmer dr Aldi Schwiiz verloo
mer ächze, steene, jommere, hänn kuum me kenne stoo
in Zuekumpft dien mer s Flaisch vyyl lieber wieder z Dytschland kaufe
s schmeggt zwor e bitzli sträng, doch ka s ellai uff Basel laufe

In Istanbul am Türggematsch mien d Schwyzer undeduure
dr Streller griegt e Schutt in Arsch, dr Huggel haut s uff d Schnuure
dr Grichting brinzlet Bluet und alli hänn sich enerviert
drbyy hänn d Türgge nur e bitzli - heftig gratuliert

Dr Hansruedi Laich carved elegant vo dr Bangg zum Skiverband
dass er vo Ski kai Aanig het, das isch doch allerhand
daas Manko macht er mit sym Bänggerwisse wett
är isch dr ainzig im Verband wo mit Gold Erfaarig het

Dr Gimenez haut bi Nacht und Nääbel ganz verstoole ab
dr Müller dä sait &Mac226;au revoir' und kindet isserscht knapp
nundebuggel zischt jetz d Gigi gstresst zem Christian Gross
alli geen - numme dr Murat wäärde mer nit loos

S menschlig Erbguet isch fascht glyych wie daas vom e Schimpans
wenn d dr Couchepin aaluegsch, dänggsch: daas stimmt voll und ganz
dr Deiss luegt wien en Uhu, dr Schmid lauft wien e Pfau
dr Moritz glyycht em Fuuldier und dr Blocher isch e - Fuggs

Im Pisa-Quiz hänn sich d Ziircher mega engagiert
und am Schluss, s isch total geil, dr eerscht Bryys kassiert
die Määr vom gscheite Kanton wird e weeneli relativiert
wenn me mit 100 Schugger e lääri Bangg attagiert

Dr Pfuus fallt uus und alli Faargescht mache sich uff d Sogge
statt ass dr Weibel waiblet blybt dää Dissi aifach hogge
miir glaube nit an e PC-Panne, au nit an schlächti Sitte
vermuetlig isch s e Variante gsi vo dr Voogelgrippe

Dr Prinz Albert vo Monaco het e schwaarze Soon
dää brünftig, ryych Fraueheld stygt ainewääg uff e Troon
wenn das ganz so aifach wäär, hätte mir am Änd
scho lengschtens unsere Oschpel als Bundespresidänt


Schloofkappe

Es duet no lang nit alle gfalle
sich im Auti rächt aazschnalle
e SChugger het my Bappe stroppt
und iin mit äärnschter Mine gfroggt:
"Was isch denn loos mit iirer Schnalle?"
Do isch my Mammen in Oonmacht gfalle!

Zem s Anggebliemli nit z verliere
dien si s grindlig renoviere
dää Frielig syg s wie nei im Stand
faart z Basel wider ummenand
e soone Kur wäär doch, das schwöör y
au nit schlächt fir d Gigi Oeri

Y haa - drum bin y ganz vergniegt
im Zyygnis Super-Noote griegt
dr Bappe het e Zaiche gsetzt
und my Saggäld zimftig uffegsetzt
wenn s so wytergoot, duet sich s bald loone
wäge de Styyren in Kanton Zug go z woone

Daas isch en A, und daas e B
e Null isch wäder A no B
noonemool:
Daas isch s A, und daas isch s B
die Null isch wader A no B
iir hänn s begriffe? Wunderbaar!
Aber mach daas emool em e Ziircher glaar!

Doletschti han y en Albdraum ghaa
e Kampfhund gryfft mi vo hinden aa
vor Angscht, dass dää my Fuudi drifft
han y fascht no ins Pyjama gschifft
dr Swisscom-Chef het s glyych Brobleem
wenn si dr Blocher ab dr Laine leen

D Wildsäu mache, s isch e SChand
e Riiseschaaden in däm Land
y hätt e Bombeväärs doo präsentiert
aber my Babbe het en zensuriert
är maint - ych find s zwoor eenter dumm
fir d Politik syyg yych no z jung

Me ka jetz scho - s isch nit zem lache
au Kinder ganz synteetisch mache
es glappt zwoor noonig jeedesmool
s Hiirni blybt schyynts mänggmool hool
die, wo soo drnääbe groote
haisse hittigsdags Chaote

Bi dr NASA schreyt ain ganz uffgreggt:
y haan e nei schwaarz Loch entdeggt!
vom Hubble-Teleskoop uus gsee
isch daas Loch ganz dytlig z gsee
soon e Sensazioon git s sälte mee
jetz zaigt är s Bild em Nicolier
dää lacht und rieft: ojee, ojee!
mach doch nit soon e grooss Grageel
dasch doch dr Chienbäärg, du Kameel!


Schmiirfingge

Im Bischtum kocht e Gfliigelsuppe langsaam vor sich aane
In Röschenz schreit me Sabo-tasch, das isch doch nur Schikaane
Em Koch dämm waggst e Fääderglaid, do sin mir aber froo
So Vyycher mues me yynespeere, und nimme use loo

Dr Ospel zieht no Wollerau, will zinftig Styyre spaare
Mir hoffe doch ass siini Frind, au deert sich um ihn schaare
E soone Umzug isch jo diir, mir wurde ihm gärn spände
Dr ganzi Stutz vom Schnabelbryys, denn duet die Gschicht mool ände

Mit blaue Disch und gääle Stiehl, e Palme und Mimöösli
Drei Sunneschirm in rot und grien, e Vaase mit me Röösli
Mir finde das nit halb so schlimm, estethisch no im Glaare
No besser als die Waalplakat, mit dääre Zanolaare.

Dr Jugend iir Kultuurfest isch, e riise groose Frust
Dr Wirtverband dä redet so, das bringt doch nur Verlust
Sits schiffe duss e Fufzger koscht, as glaine Tip vo uns
E Pissoir mee in jeder Baiz, bringt Stutz mit jedem Brunz.

Dr Äschbi sait zem Epiney "Du etze han is duss"
Bi dääne änge Sitzplätz isch's im Joggeli e Gnuss
Dr Elton John as Fuessball-Fään maint zu sym Schatz "kai Gfaasel
Dr näggschti Matsch wenn d'Wärmi bruuchsch dää luege mir in Baasel

Mir Schwyzer sin jo wältbikannt, mir sin e Raridäät
Ob Rolex oder Omega, mit steen fir Qualidäät
Jetz hän die Diirgge uns entdischt, dien haillos iibertryybe
Und dien vor unsre Uhre jetz sogar e H no schryybe

Suechsch Glaider, bitz modäärn und schigg, muesch in dr Freie schoppe
D'Finanzschongglöör aller culöör dien deerte au gärn stoppe
Dr Ackermaa zer Behringsfrau &Mac226;Di Maa derf nimmi knaiffe!
Am beschte machsch em jetz e Glaid mit scheene schwarz-wyss Straiffe!

Jetz dien die "FIFA-Santigläus" dr Benni Huggel Speere
Das syg nur wäg em Blatter Sepp die hän e Spleen die Heere
S'wäär besser gsii dr Zubi hät dä Tritt in Arsch begange
No hätt dr Köbi Kuehn jetz ein im Gool wo d'Bäll kaa fange

Dr Vosseler sait zer Frau Frey my ganz lieb Saskia-Schätzli
S'isch truurig wie me's macht de Baim jetz stehen sy nimm am Plätzli
Du hättisch miesse aane goo und's länger deerte tryybe
No hätte si vor lutter Schregg denn s'Fälle glatt lo blyybe


Sechbeggi

Unseri BAZ, isch Vor dr Wiehnacht hämmer miese arg studiere
Je wie wämmer unser Bäumli dekoriere
Dorum dien mir uns ganz klaar,uff ains beschrängge
Und dien dr Schorsch vom Haafebeggi anehängge

D'Calmy-Rey die macht e myserabli Falle
Do hett'ys s'Dreyfuess-Ruthli doch no besser gfalle
an dr Gosche und dr Mähne'jo do mergges alli gli
das ka nur em Dimitri,oh Schregg,sy Zwillings-Schwester sy

D'Barbara Schneider -- die isch bi dr Ha-ne-ro
Im Bluse naije,ouw-wouw-wouw,gross use ko
Mir finde das isch wirgglig toll,aber looset im Vertraue
Uns Drey isch es nämmlig lieber, Si duet näye anstatt baue

Am Jugend-Wältfescht-Kirche-Daag,duets gruusig Kroose
Do hetts e'mängge Kirchefürscht ganz böös verbloose
Nur dr hailig BENEDIKTO het juhui dä gueti Maa
Mir drey hänns am Färnseh gseh,ganz bestimmt kai Kappe-n-aa

E mängge Schuggerboschte, isch jetz am verschwinde
Dr Megge Meier ka sy Schloofstell nimme finde
In Zuekunft muess Är amme, jee das isch zem gruuse
Wenn`r mied isch, uff-em nägschte Bänggli pfuuse

Mir Sechbeggi sammle-sammle-sammle-sammle
Fir s`Stadt-Casino und firs Bähnli vo de Rammle
Au sammle mir fascht alli Daag, fir jedes Doddeli
Als neyschte Gägg do sammle mir im Drämmli Foddeli

Unseri Fuessball-Natzi schudded, das sin Sache
Langsam sin au unseri Schy-As, am verwache
Und wie dr Küttel gumpt, sau-wyt, so wämmer meine
Nur als Bundes-Presi blybt dr Leuebibs, e' Glaine

Dr Hansli dued sich in dr erschte-Klass beschweren
Warum müssen wir,das kaiben Hauchdeutsch lehren
Schliesslig ka Herr Bundesroot: " der mit der Glatzen
am Fernseh über die Finanzen, auch nicht schwatzen"


d' Uffeschtuehler

Dr Guschbää sait - ich due saniere
by dr - Ah…Ha…Vau…
e ganz ney Gsetz - daas han ych gmacht
es gilt fir - Maa und Frau
ych muess daas nur noo - duuresetze
by Kollege - und Bundesgricht
denn darfsch ab fuffzig - by root iber d'Schtroos
yber sächzig - ischs denn Pflicht

Alaarm in Ziri - s'scih Bangg Yberfall
dr Gängschter - nimmt zwai Gaisle
d'Schugger sinn - mit Muusig koo
dr Gängschter hett - s Hinterdiirli gnoo
sy warte zirkaa - sibe Schtung
gehen hai ganz stolz - goo feschte
jää Zircher sinn - noo Pisa Tescht
offiziell - die Beschte

By dr Beate Uhse - in dr Clarastroos
im Laade - die Sach isch haiss
steehn säggs Schugger - ai Fyrweehrmaa
und mache schambaar - Mais
ych haa dänggt - dasch e Razzia
die steehn saudumm - im Gländ
doch sy wänn - nur ebbis kaufe
und händle - um Staats Prozänt

ych Achmed krass - bin Basel koo
an Dutschlandgränz - waisch Bässler gut
woo Babyyr gitt - in Asylhaim
drum mir gfallt doo - und gooht au gut
ych integriert und - Faasnacht mach
mit Mustafa, Ali - und Aische
bänggschnitzel fertig - sinn alli frooh
muess Achmed näggscht Joohr - widder koo.

alli Veegel - sinn uff Basel koo
uss Ziri - und Umgääbig
d'Trottoir-Amsle - sinn au scho doo
sinn frooh - sinn sy noo lääbig
ganz bruttaal - mache d'Zircher jaggt
wääge - dr Vogelgribbe
sofort sinn alli - uff Basel gschtartet
nur dr Eemuu - hett zlang gwartet.

Graad - isch e Mäldig ynekoo
vom Ratzi - im Vatikaan
är isch graad - zer Ysicht koo
und syg - ab hitt humaan
s'draage vo kondoom - isch ab jetzt erlaubt
fir alli syni - Scheefli
waas doo demitt - nit mache derfsch
sinn jeegligi - By Schleefli

Gescht z'Oobe im Schluuch - am Masgge-Ball
hett gschpielt - e Rääntner-Bänd
woo ych dopfniechter - zer Baiz ussgang
stooht mir e Dotsch - uff d'Händ
ych schtand denn uff - und lueg dää aa
und saag - duu bleede Wicht
y drill my um - will haimzuegooh
doo gumbbt mir d'Schtroos - ins Gsicht.

Mir fraien is scho - uffs s näggschti Joohr
uff d Faasnacht scho - ganz gryysli
denn singe mir - doo inne denn
in dääm glaine - Hyysli
sisch furchtbaar äng dinn - kaasch mers glaube
und schmegge duets - ganz gruusig
doch doo yyne - kunnt sicher nitt
ai ainzigi - Guggemuusig.

D'Meedie hänn - en Umfroog gmacht
vo Basel bis - Sangt Galle
welle Schwyzer - isch dr Bescht
hett allne - am beschte gfalle
s'isch dr Gooly - Zuberbieler
s'Volgg ihm - d'Schtimme bringt
äär hett sogaar - en aige Lied
woo ganz Basel - singt ………
……… die Hände zum Himmel es isch soo wunderscheen
………wenn dr Kööbi und dr Gross my in Kischte leehn
……… und die Hände zum Himmel es isch soo wunderscheen
……… wenn d'Balle am e Matsch nir zwische d'Finger geehn


Weggli-Buebe

em Bischoff Koch vo Solothurn duet's gruuuse
belegt dr Pfarrer Sabo mit em Bann
är hett em gsait wenn du nit folggsch fliegsch uuuse
s'nützt nüt - dr Kirchewandel isch im gang
am beschte gseh'schs im Vatikan - mir schtuune alli vier
jetzt gitts wäge däm Schwoobepapscht - schtatt Mässwyy nur noh Bier

Pandemie - unbekannti Süüüüche
fir d'Menschheit do wird's langsam kompliziert
jetzt gitt's e neyi Grangget - s' goht an d'Psyyyyche
sy hett dr Zuberbühler infiziert
s'isch nit d Vogelgrippe nai - das wär nur halb so schlimm
är hett s' Dernäbelängsyndrom - schprich jede Schuss isch dinn

zem s'Pilotebrevet kenne z'grieeege
muesch lang in d'Schuel und alles ohni Lohn
schaff'sch by der Swiss muess wenig Gäld dir gnieeege
worum fiehrt ys das nur zum Raymond Cron?
jo dä verdient doch gnueg - und wenn's nit längt denn duet är's biege
s'isch nur will dä bym BAZL sötti - gratis lehre fliege

d'Schwyzer Nati - jo das freut ys schuuurig
die hett sich gäge d'Türgge duuregsetzt
jetzt sin die dert am Boschporus ganz druuurig
und hänn derwääge alli d'Mässer gwetzt
jetzt gitt's denn noh ne Schtaigerig - jo das wird richtig gschpässig
denn wenn se d'EU au nit will - was mainsch wie sin die hässig

Politisch nit korräggt - s'isch kuum z'ertraaage
d' Moral die goht an Arsch ganz peu à peu
das goht doch nit - nai pfui - uns platzt dr Kraaage
dr Saskia ihre schafft im Milieu
jetzt wüsse mir doch ändligg - pscht…mir dien's ganz lysligg singe
wämm mir denn nach em Schaffe als - dr letschty Schtutz dien bringe

z'Basel hett me scheeni neyi Drämmli
die bräche zämme vor sy roschte dien
mir maine doch d'Combinodrämmli nämmli
mit Klima und höchscht elegantem Grien
die letschte zwei sin bis jetzt nonig - vomelai verreggt
drum hett se ain am Barfi unde - im Schloof no zämmegleggt

im Schwoobeland es duet nit iiberrasche
herrscht aimool meh scho wider d'Euphorie
im Fuessball dät me d'Gägner klar vernasche
und glaubt me wurd denn Worldcupsieger sy
doch nimmsch d' Frau Merkel als Symbol-die risst denn als e Schnutte
denn muesch kai Angscht ha-nai- do waisch genau wie die denn schutte

als Schnitzelbänggler sotsch dy nit verdinge
am Schnaabelbryys fir Gäld uff d'Bühni stoh
doch fir e guete Zwägg do derf me singe
drum dien mir uusnahmwys jetzt das Johr goh
dr Gwünn - he Marcel Ospel - e Griessli an die neyi Frau
bringe mir dir zem Stüüreschpare - sofort uff Wollerau

die Dütsche wänn ys z'Rieche zimpftig schelle
s' gooht um die gruusig bleedi Zollfreyschtrooss
die frooge nim - die dien ganz aifach felle
d'Empeerig die isch z'Basel zimmligg gross
das sett me nit so äng gseh - denn die scheeni neyi Schtrooss
fiehrt d'Schwoobe an dr Schtadt verby - jo das isch doch famos

um ys vor dr Vogelgrippe z'schütze
hänn mir e Packig Tamiflu uns kauft
mir hoffe dass das Mitteli duet nütze
bevor die Grangget usem Rueder lauft
die Angscht muesch ha, denn syt de Wahle - es isch unerklärligg
hett's im Roothuus scho drei Hiehner - jo jetzt wird's langsam gfährligg

8. März 2006


 Ihre Meinung zu diesem Artikel
(Mails ohne kompletten Absender werden nicht bearbeitet)
https://www.onlinereports.ch/fileadmin/templates/pics/echo.gif

"Eine einzigartige Idee"

Chapeau, eine einzigartige Idee. Damit kommen die guten Sprüche der Sprüche der BSG

zu den auswärtigen Bebbi.

 


Bruno Honold, Basel



Was Sie auch noch interessieren könnte

Tschudy-Villa steht jetzt
unter Denkmalschutz

12. März 2024

Der Eigentümer muss das teils abgerissene Gebäude in Sissach wieder aufbauen.


"Incoronazione di Poppea":
Auch musikalisch eine Grosstat

4. März 2024

Opernpremiere am Theater Basel – Christoph Marthaler enttäuscht nicht.


Reaktionen

"Carmen" als Stellvertreterin
der unterdrückten Frauen

4. Februar 2024

Das Theater Basel stülpt Bizets Oper eine politische Botschaft über.


Stiftungsgeld rettet
Verein Kosmos Space

23. Januar 2024

Krise beim Senioren-Projekt auf dem Bruderholz: Vorstand trat in corpore zurück.


20 Jahre Joker in
Sissach – mit demselben Wirt

18. Januar 2024

Didi Wanner hat mit seinem Nachtlokal viele andere Clubs in der Region überlebt.


Eltern und Kinder irritiert:
Warum ist das Karussell stumm?

1. Dezember 2023

Der langjährige Konflikt um den Münsterplatz nimmt absurde Züge an.


Reaktionen

152 Tage und weiterhin
voller Tatendrang

29. November 2023

Jan Amsler und Alessandra Paone geben Einblick in ihre erste Zeit bei OnlineReports.


Nach 43 Jahren ist
Schluss für Rapunzel 

13. November 2023

Die Buchhandlung im Liestaler Kulturhaus Palazzo schliesst Ende Januar.


Reaktionen

Jetzt ist Vic bei
Jimi – ein Nachruf

9. November 2023

Der Gitarrist spielte auf seiner Gibson, als ob der Leibhaftige hinter ihm her wäre.


Reaktionen

Oper "Walküre" in Basel:
Brüche im Regiekonzept

17. September 2023

Die Premierenkritik zum zweiten Teil von Richard Wagners "Ring des Nibelungen".


www.onlinereports.ch - Das unabhängige News-Portal der Nordwestschweiz

© Das Copyright sämtlicher auf dem Portal www.onlinereports.ch enthaltenen multimedialer Inhalte (Text, Bild, Audio, Video) liegt bei der OnlineReports GmbH sowie bei den Autorinnen und Autoren. Alle Rechte vorbehalten. Nachdruck und Veröffentlichungen jeder Art nur gegen Honorar und mit schriftlichem Einverständnis der Redaktion von OnlineReports.ch.

Die Redaktion bedingt hiermit jegliche Verantwortung und Haftung für Werbe-Banner oder andere Beiträge von Dritten oder einzelnen Autoren ab, die eigene Beiträge, wenn auch mit Zustimmung der Redaktion, auf der Plattform von OnlineReports publizieren. OnlineReports bemüht sich nach bestem Wissen und Gewissen darum, Urheber- und andere Rechte von Dritten durch ihre Publikationen nicht zu verletzen. Wer dennoch eine Verletzung derartiger Rechte auf OnlineReports feststellt, wird gebeten, die Redaktion umgehend zu informieren, damit die beanstandeten Inhalte unverzüglich entfernt werden können.

Auf dieser Website gibt es Links zu Websites Dritter. Sobald Sie diese anklicken, verlassen Sie unseren Einflussbereich. Für fremde Websites, zu welchen von dieser Website aus ein Link besteht, übernimmt OnlineReports keine inhaltliche oder rechtliche Verantwortung. Dasselbe gilt für Websites Dritter, die auf OnlineReports verlinken.

Veranstaltungs-Hinweis

 

Ein zärtlicher Irrsinn

Nach achtjähriger Abwesenheit kehrt Avery Sutton mit seiner Verlobten Gillian zu seiner Familie zurück. Was von da an passiert, muss man gesehen haben.

Mit "37 Ansichtskarten" von Michael McKeever winkt den Zuschauerinnen und Zuschauern eine zauberhaft schwarze Komödie mit berührenden Momenten und angenehmer Unterhaltung. Wir freuen uns auf Ihren Besuch!

Vorverkauf hier:
www.theater-rampenlicht.ch

https://www.onlinereports.ch/fileadmin/templates/pics/gelesen.gif
"Der neue Eingang zum Birsigparkplatz wird der Ersatzneubau des Heuwaage-Hochhauses bilden."

bz
vom 26. März 2024
https://www.onlinereports.ch/fileadmin/templates/pics/gelesen.gif

Wer bildet was oder wen?

RückSpiegel


Die Volksstimme greift die OnlineReports-Recherche über das Aus des Textildruck-Unternehmens Permatrend auf.

Im Bericht über "Unruhe am Regioport" bezieht sich Bajour auf die OnlineReports-Ursprungsrecherche aus dem Jahr 2018.

Die Basler Zeitung bezieht sich in einem Artikel über die Kantonsfinanzen im Baselbiet auf OnlineReports.

Die bz verweist in einem Bericht über die Neuausrichtung der Vorfasnachts-Veranstaltung Drummeli auf einen Artikel aus dem OnlineReports-Archiv.

Die Basler Zeitung zitiert in einem Leitartikel über die SVP aus OnlineReports.

Baseljetzt bezieht sich in einer Meldung über den Rücktritt von Ralph Lewin als SGI-Präsident auf OnlineReports.

Die Basler Zeitung nimmt die OnlineReports-Recherche über den blockierten Neubau der BVB-Tramstrecke über das Bruderholz auf.

Die Basler Zeitung und Infosperber übernehmen die OnlineReports-Meldung über den Tod von Linda Stibler.

Die bz zitiert den OnlineReports-Artikel über die Wiedereröffnung des Gefängnisses in Sissach.

Baseljetzt erzählt den OnlineReports-Artikel über die Räppli-Krise nach.

Das Regionaljournal Basel, Baseljetzt, BaZ und 20 Minuten vermelden mit Verweis auf OnlineReports den Baufehler bei der Tramhaltestelle Feldbergstrasse.

Die Basler Zeitung bezieht sich in einem Interview zu den Gemeindefusionen auf OnlineReports.

persoenlich.com und Klein Report vermelden mit Verweis auf OnlineReports die Personalrochade bei Prime News.

Die Volksstimme schreibt über die Wahl von Claudio Miozzari zum Grossratspräsidenten von Basel-Stadt und zitiert dabei OnlineReports.

In einem Artikel über die Leerstandsquote bei Büroflächen in Basel nimmt die bz den Bericht von OnlineReports über einen möglichen Umzug der Basler Polizei ins ehemalige Roche-Gebäude an der Viaduktstrasse auf.

Das Regionaljournal Basel und die bz berichten über die Bohrpläne der Schweizer Salinen im Röserental und beziehen sich dabei auf OnlineReports.

Weitere RückSpiegel

Werbung






In einem Satz


Der Baselbieter Regierungsrat hat Raphael Giossi zum Nachfolger des langjährigen kantonalen Bieneninspektors Marcel Strub gewählt.

Cyril Bleisch übernimmt bei den Jungfreisinnigen Baselland das Präsidium von Lucio Sansano.

Die Basler Sozialdemokraten haben die SP queer Basel-Stadt gegründet und als neues Organ in den Statuten der Partei verankert.

Eiskunstläuferin Kimmy Repond und Wasserfahrer Adrian Rudin sind Basler Sportlerin beziehungsweise Basler Sportler des Jahres.

Jean-Luc Nordmann übergibt das Präsidium der Stiftung Tierpark Weihermätteli per 1. Januar 2024 an Martin Thommen.

Iris Graf steigt von der Projektleiterin und akademischen Mitarbeiterin der Baselbieter Fachstelle für die Gleichstellung von Frauen und Männern zur Leiterin auf.  

Sonja Kuhn,
ehemalige Co-Leiterin der Abteilung Kultur Basel-Stadt, ist neu Präsidentin der SRG Region Basel.

Florian Nagar-Hak und Saskia Bolz übernehmen die Leitung des Gesundheitszentrums Laufen, das zum Kantonsspital Baselland gehört.

Mohamed Almusibli übernimmt ab März 2024 die Direktion der Kunsthalle Basel von Elena Filipovic.

Marilena Baiatu ist neue Kommunikationsbeauftragte der Staatsanwaltschaft im Kanton Baselland und ersetzt Thomas Lyssy, der Ende November pensioniert wird.

 

Mitte-Landrat Simon Oberbeck folgt am 1. August 2024 als Geschäftsführer der Schweizerischen Vereinigung für Schifffahrtund Hafenwirtschaft auf André Auderset.

Die Junge SVP Basel-Stadt hat Demi Hablützel (25) einstimmig für zwei weitere Jahre als Präsidentin wiedergewählt.

Dominic Stöcklin wird neuer Leiter Marketing und Mitglied der Geschäftsleitung von Basel Tourismus.

 

Samir Stroh, aktuell Gemeindeverwalter in Brislach, übernimmt Anfang Mai 2024 die Leitung von Human Resources Basel-Stadt.

Das Sperber-Kollegium hat Sterneköchin Tanja Grandits zur "Ehrespalebärglemere 2023" ernannt.

Der mit 50'000 Franken dotierte Walder-Preis geht dieses Jahr an Konrad Knüsel, den Präsidenten des Vernetzungsprojekts Rodersdorf und des Naturschutzvereins Therwil.

Götz Arlt tritt am 1. Januar 2024 die Nachfolge von Christian Griss an und übernimmt die Stufenleitung der Sekundarschulen I im Bereich Volksschulen des Erziehungsdepartements Basel-Stadt.

Michael Gengenbacher tritt am 1. Februar 2024 seine neue Stelle als Chief Medical Officer (CMO) und Mitglied der Spitalleitung beim Bethesda Spital an.

Markus Zuber übernimmt am 1. Oktober die Leitung der St. Clara Forschung AG (St. Claraspital).

Das Präsidium der Juso Baselland besteht neu aus Clara Bonk, Angel Yakoub (Vize) und Toja Brenner (Vize).